អាជ្ញាធរខេត្តជាប់ព្រំដែន បានបញ្ជូនពលករខ្មែរមកពីថៃជាង១៥០នាក់ ត្រឡប់ទៅស្រុកកំណើតរៀងៗខ្លួនវិញ បន្ទាប់ពីពួកគេបានធ្វើចត្តាឡីស័កគ្រប់ចំនួន១៤ថ្ងៃរួចមក។
លោក លី សារី អភិបាលរង និងជាអ្នកនាំពាក្យសាលាខេត្តបន្ទាយមានជ័យ បានមានប្រសាសន៍ថា សាលាខេត្តបានចេញលិខិតបញ្ជាក់សុខភាពថា មិនមានជំងឺកូវីដ១៩ដល់ពលករខ្មែរមកពីថៃជាង១០០នាក់ ឲ្យពួកគាត់វិលត្រឡប់ទៅស្រុកកំណើតវិញ បន្ទាប់ពីពួកគាត់បានធ្វើចត្តាឡីស័កគ្រប់ចំនួន១៤ថ្ងៃរួចមក។ លោកបានបន្តថា ការចេញលិខិតបញ្ជាក់សុខភាពនេះ ដើម្បីឲ្យអាជ្ញាធរខេត្ត ដែលទទួលពលករបន្តងាយស្រួលចាត់ចែង និងគ្រប់គ្រងឲ្យបានល្អសំដៅចូលរួមទប់ស្កាត់ការឆ្លងរីករាលដាលចូលទៅក្នុងសហគមន៍។ លោកបានបន្ថែមទៀតថា រហូតមកដល់ថ្ងៃទី៧ ខែមករា ឆ្នាំ២០២១ មានពលករខ្មែរមកពីថៃចូលមកខេត្តបន្ទាយមានជ័យប្រមាណជិត២ពាន់នាក់។
ចំណែក លោក ឱសថបណ្ឌិត វឿង ប៊ុនរេត ប្រធានមន្ទីរសុខាភិបាលខេត្តបាត់ដំបង បានឲ្យដឹងថា ខេត្តបាត់ដំបង មានពលករខ្មែរបញ្ចប់ការធ្វើចត្តាឡីស័ក និងបញ្ជូនទៅស្រុកកំណើតចំនួន៥១នាក់ស្រី២២នាក់ ក្នុងចំណោមពលករសរុបចំនួន២១៤០នាក់ មានវិជ្ជមានវីរុសកូវីដ១៩ចំនួន៦នាក់ ក្នុងនោះពលករកំពុងបន្តធ្វើចត្តាឡីស័កនៅមណ្ឌល១ចំនួន១៤៨៦នាក់ ស្រី៦០៤និងនៅមណ្ឌល២ចំនួន៤៣នាក់ស្រី២៥នាក់។ លោកបានបន្តថា មន្ទីរបានយកសំណាកជាលើកទី២ចំនួន១៤៣នាក់ លទ្ធផលអវិជ្ជមានទាំងអស់។
លោក អ៊ុន ប៊ុនលី នាយករដ្ឋបាលសាលាខេត្តប៉ៃលិន បានឲ្យដឹងថា រីឯខេត្តប៉ៃលិនមានពលករចំនួន៧នាក់ បានបញ្ចប់ការធ្វើចត្តាឡីស័ក ក្នុងចំណោមពលករចំនួន១០១០នាក់ ស្រី៤៩៨នាក់ ក្នុងនោះរកឃើញឆ្លងកូវីដ១៩ចំនួន១៣នាក់។ លោក អ៊ុន ប៊ុនលី ក៏បានបន្តថា ក្នុងចំណោមពលករខ្មែរជាង១ពាន់នាក់នោះ អ្នកធ្វើចត្តាឡីស័កសរុបចំនួន៣៦៦នាក់ ក្នុងនោះធ្វើចត្តាឡីស័កនៅមណ្ឌលចំនួន២៣៥នាក់ ធ្វើចត្តាឡីស័ក នៅតាមផ្ទះចំនួន១៣១នាក់ ។
យោងតាមក្រសួងសុខាភិបាលបានឲ្យដឹងថា គិតត្រឹមម៉ោង៧ព្រឹកថ្ងៃទី០៨ ខែមករា ឆ្នាំ២០២១នេះក្នុងចំណោមអ្នកឆ្លងជំងឺកូវីដ១៩ សរុបចំនួន៣៨៦នាក់ ក្នុងនោះមានពលករខ្មែរមកពីថៃចំនួន២១នាក់ មាន១៣នាក់នៅខេត្តប៉ៃលិន ៦នាក់នៅបាត់ដំបងនិង២នាក់នៅខេត្តបន្ទាយមានជ័យនិងមានអ្នកជាសះស្បើយចំនួន ៣៦២នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ២៤នាក់៕
