ឥណ្ឌូណេស៊ីបានរឹបអូសទូកនេសាទវៀតណាមបន្ទាប់ពីមានការប៉ះទង្គិចគ្នា នៅក្នុងដែនសមុទ្រ

(ហ្សាការតា)៖ ឥណ្ឌូណេស៊ីបានរឹបអូសទូកនេសាទវៀតណាមពីរគ្រឿង បន្ទាប់ពីមានការប៉ះទង្គិចគ្នា នៅក្នុងដែនសមុទ្ររបស់ខ្លួន ជាមួយក្រុមអ្នកនៅលើទូកនេសាទខុសច្បាប់ទាំងនេះ។ នេះបើតាមការចេញផ្សាយ ដោយសារព័ត៌មាន CNA នៅព្រឹកថ្ងៃសុក្រ ទី២៤ ខែកក្កដា ឆ្នាំ២០២០។

បើតាមអាជ្ញាធរឥណ្ឌូណេស៊ី ទូកនេសាទវៀតណាមទាំងពីរគ្រឿងខាងលើ ទំនងជាបានធ្វើការនេសាទដោយខុសច្បាប់ នៅតាមជ្រោយនៃតំបន់សមុទ្រចិនខាងត្បូង ហើយអ្នកនៅលើទូកថែមទាំងបានតដៃ និងតឹងសសៃកជាមួយអាជ្ញាធរ អស់រយៈពេលជាង ២ម៉ោង កំឡុងពេលចាប់ខ្លួនផងដែរ។

ជុំវិញហេតុការណ៍ខាងលើនេះ លោក ម៉ារ៉ាហ្វ (Ma'ruf) ជាកាពីទែននៃ នាវាចម្បាំងមួយគ្រឿងរបស់ឥណ្ឌួណេស៊ី បានគូសបញ្ជាក់យ៉ាងដូច្នេះថា «កាពីទែននៅលើទូកនេសាទវៀតណាមមួយគ្រឿង ក្នុងចំណោមពីរគ្រឿងបានតដៃ និងវាយប្រហារមកលើពួកយើងវិញ ប៉ុន្តែយើងនៅតែអាចគ្រប់គ្រងស្ថានការណ៍បាន»។ ដោយឡែកកម្មកររាប់សិបនាក់ លើទូកនេសាទវៀតណាមទាំងពីរគ្រឿងនេះ ត្រូវបានអាជ្ញាធរឥណ្ឌូណេស៊ីចាប់ខ្លួន។

គួរបញ្ជាក់ថា ឥណ្ឌូណេស៊ីដែលជាប្រទេសមានទីប្រជុំកោះ ច្រើនជាងគេបំផុតនៅលើពិភពលោកបានអះអាងថា ការនេសាទដោយខុសច្បាប់ បានធ្វើឱ្យខ្លួនខាតបង់សេដ្ឋកិច្ចរាប់ពាន់លានដុល្លារក្នុងមួយឆ្នាំៗ ខណៈបច្ចុប្បន្នខ្លួនកំពុងព្យាយាម បញ្ឈប់ទូកនេសាទបរទេសដែលទន្ទ្រានចូលមកនេសាទ នៅក្នុងដែនទឹករបស់ខ្លួនដោយខុសច្បាប់។

កាលពីខែមីនាកន្លងទៅ ឥណ្ឌូណេស៊ីបានរឹបអូសទឹកនេសាទវៀតណាមចំនួន ០៥គ្រឿង និងឃាត់ខ្លួនមនុស្ស ៧០នាក់ ដែលចូលមកនេសាទនៅក្នុងតំបន់ដែនសេដ្ឋកិច្ច ពិសេសផ្ដាច់មុខនៅក្នុងសមុទ្រចិនខាងត្បូង ហើយជាធម្មតាទូកនេសាទ ដែលត្រូវបានចាប់នោះ គឺត្រូវបំផ្ទុះឲ្យលិចចូលក្នុងសមុទ្រតែម្តង៕