ក្រសួងសុខាភិបាលនៅថ្ងៃព្រហស្បតិ៍នេះ បានចេញសេចក្តីជូនដំណឹងមួយស្តីពីការផ្ទុះឡើងនៃជំងឺឈីកគន់ហ្គន់យ៉ា(Chikunngunya) នៅក្នុងប្រទេសកម្ពុជា។ ការប្រកាសរបស់ក្រសួងសុខាភិបាលដូច្នេះ ធ្វើឡើងបន្ទាប់ពីអ្នកភូមិជាច្រើននាក់នៅសង្កាត់ប៉ោយប៉ែត ខេត្តបន្ទាយមានជ័យត្រូវបានរកឃើញថាមានអាការៈមិនស្រួលខ្លួន ហើយត្រូវបានបញ្ជូនទៅកាន់មន្ទីរពេទ្យ និងមណ្ឌលសុខភាពជាបន្តបន្ទាប់។
ប្រជាពលរដ្ឋប្រមាណជាង១០០នាក់ ដែលរស់នៅ ក្នុងសង្កាត់ប៉ោយប៉ែត ខេត្តបន្ទាយមានជ័យចំនួន៦ភូមិ ត្រូវបានក្រសួងសុខាភិបាលបញ្ជាក់ថាពួកគេបានកើតជំងឺឈីក ឬឈីកគន់ហ្គន់យ៉ា។ ការបញ្ជាក់របស់ក្រសួងសុខាភិបាលតាមរយៈសេចក្តីជូនដំណឹងនៅថ្ងៃនេះ ធ្វើឡើងបន្ទាប់ពីមានពលរដ្ឋជាច្រើនបានធ្លាក់ខ្លួនឈឺ ចេញរោគសញ្ញាគ្រុនក្តៅ ៣៨អង្សារសេ កន្ទួលក្រហមលើស្បែក និងឈឺសន្លាក់ដៃជើង។
ប្រឈមនឹងរោគសញ្ញាដូច្នេះ ក្រុមគ្រូពេទ្យក្រសួងសុខាភិបាល និងខេត្តបន្ទាយមានជ័យ បានប្រមូលសំណាកវត្ថុវិភាគឈាមពីអ្នកភូមិទាំងនោះ មកធ្វើវិភាគដោយវិទ្យាស្ថានប៉ាស្ទ័រ ដើម្បីស្វែងរកមើលវីរុសគ្រុនឈីក វីរុសកញ្រ្ជឹល ស្អូច និងសំណាកសម្រាប់ធ្វើតេស្តរកវីរុសកូវីដ១៩ ចាប់តាំងពីថ្ងៃទី១៩ ដល់ថ្ងៃទី២២ ខែកក្កដា ឆ្នាំ២០២០។
រដ្ឋមន្ត្រីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង ថ្លែងថា ការទប់ស្កាត់ និងការពារជំងឺគ្រុនឈីកនេះ គឺវាដូចគ្នាទៅនឹងជំងឺគ្រុនឈាមដែរ ដោយផ្អែកទៅលើការការពារកុំឲ្យមូសខ្លាញីខាំ តាមរយៈកំចាត់ចោលនូវវត្ថុដក់ទឹក ដែលជាជម្រកនៃការកកើតសត្វមូស។
សូមរំលឹកថាជំងឺគ្រុនឈីកនេះ បានកើតឡើងដំបូងបំផុតនៅឆ្នាំ១៩៥៣ នៅទ្វីបអាហ្វ្រិក និងធ្លាប់បានរកឃើញដំបូងនៅប្រទេសកម្ពុជានៅឆ្នាំ១៩៦១ និងឆ្នាំ២០១១ ដែលករណីនេះបានកើតឡើងនៅខេត្តបាត់ដំបង សៀមរាប និងព្រះវិហារ ហើយគ្រុនឈីកធ្លាប់មានអត្រាឆ្លងរោគខ្ពស់រហូតដល់៦០ទៅ៧០% ក្នុងប្រទេសកម្ពុជានាទសវត្សរ៍ទី៦០ ហើយមានការរាតត្បាតខ្លាំងនៅឆ្នាំ២០១១-២០១២ នៅតាមខេត្តមួយចំនួនរបស់កម្ពុជា។
ក្រសួងសុខាភិបាលកម្ពុជាក៏បានបញ្ជាក់ដែរថា ការលេចឡើងជាថ្មីនូវវត្តមានជំងឺឈីកនេះ អាចជាបញ្ហាប្រឈមសុខភាពសាធារណៈ និងមានហានិភ័យក្នុងការឆ្លងរាលដាលពីមនុស្សម្នាក់ទៅមនុស្សម្នាក់ទៀត ក៏ប៉ុន្តែហានិភ័យដែលបណ្តាលឲ្យមនុស្សស្លាប់មានកំរិតទាប បើប្រៀបធៀបទៅនឹងជំងឺគ្រុនឈាម៕
