អ្នកវិទ្យាសាស្ត្របានរកឃើញវត្តមានដំបូង នៃសត្វមេអំបៅពីរប្រភេទនៅកម្ពុជា

 ភ្នំពេញ ថ្ងៃទី៣០ ខែមេសា ឆ្នាំ២០២០ — អ្នកវិទ្យាសាស្ត្របានអះអាងអំពីវត្តមានដំបូង នៃសត្វមេអំបៅពីរប្រភេទនៅកម្ពុជាក្រោយពេលដែលពួកវាត្រូវបានគេរកឃើញ និងកត់ត្រាកាលពីសតវត្សទី១៩ និងទី២០ ។

យោងទៅតាមព្រឹត្តិប័ត្រប្រវត្តិធម្មជាតិកម្ពុជា (Cambodian Journal of Natural History) ដែលបាន ចេញផ្សាយកាលពីពេលកន្លងទៅថ្មីៗនេះបានឱ្យដឹងថា សត្វមេអំបៅទាំងពីរប្រភេទនេះ គឺទីមួយ សត្វមេអំបៅស្លឹកដូង (Hidariȱirava) និង មេអំបៅមានទ្រនង់លើស្លាបជាប់គ្នា (Hidariȱbhawani) ។

ពពួកមេអំបៅទាំងពីរប្រភេទនេះ ត្រូវបានគេដឹងថា វាស្ថិតនៅក្នុងអំបូរ Hidari ដែលគេបានកត់ត្រាតាំងពីឆ្នាំ១៨៨៦ មកម្ល៉េះ ។ដោយឡែកសម្រាប់មេអំបៅស្លឹកដូង គឺត្រូវបានកត់ត្រានៅឆ្នាំ១៨៥៨ និងមេអំបៅទ្រនង់លើស្លាបជាប់គ្នា ត្រូវបានកត់ត្រានៅក្នុងឆ្នាំ១៩៨៩ ។

បើតាមប្រភពដដែល ពពួកមេអំបៅទាំងពីរប្រភេទនេះ ទើបតែត្រូវបានកត់ត្រានៅកម្ពុជា កាលពីពេលថ្មីៗនេះប៉ុណ្ណោះ ។

ដោយ ហេង បញ្ញា រូបថត៖ Cambodian Journal of Natural History